अपडेट

गुण्डागर्दीले कुनै हालतमा छुट पाउदैन – रामेश्वर कार्की, प्रहरी नायव उपरीक्षक दोलखा

रामेश्वर कार्की एकजना सक्षम् प्रहरी अधिकृत भनेर चिनिनुहुन्छ ।जहा जहा वहाको पोस्टिंग भएको छ त्यहा त्यहा सुशासन कायम गरि कानुन व्यवस्थालाई सबल बनाउन वहाले चालेका कदम हरुको स्थानीय बासि हरुले अझै पनि मुक्तकण्ठले प्रसंशा गर्ने गरेको पाईन्छ । रुपन्देही जिल्लामा रहदा बुटवल वडा कार्यालयमा वहाको सक्रियताकै कारण धेरै सामाजिक मुद्दा हरु अगाडी आएर समाधान पनि भएका थिए । चाडबाडको मुखमा खाद्द्यान र मासुमा समेत मिसावट गरेर बेच्ने जस्ता साना तर सामाज लाइ प्रत्यक्ष असर पर्ने बिषय हरुलाई समेत रामेश्वर कार्कीले जरै सम्म पुगेर नियन्त्रण को प्रयास गरेर सफल पनि हुनुभएको थियो ।त्यस्तै लागु औषध नियन्त्रण, यातायातका साधन चोरी गरेर त्यसको इन्जिन तस्करी गर्ने ठुलो गिरोहको पर्दाफास गर्नुभएका कार्की रुपन्देही जिल्लाका सबै भन्दा लोकप्रिय र इमान्दार प्रहरी अधिकृत भएको कारण अहिले सम्म पनि रुपन्देहीका जनता हरुले वहाको कामको मुक्त कण्ठले प्रसंशा गर्ने गर्दछन ।

अंचल प्रहरी कार्यालयका प्रवक्ता, लागु औषध नियन्त्रण ब्युरो एयरपोर्ट लगायत ठाउमा आफ्नो उत्कृष्ठ कार्यसम्पादन गर्दै अहिले दोलखा जिल्ला आईपुग्नु भएका रामेश्वर कार्कीले जनाए अनुसार जिल्ला प्रहरी कार्यालय दोलखाले जुवा तास, अवैध मदिरा, गुण्डागर्दी जस्ता गैह्रकानुनी गतिविधि नियन्त्रण गर्न विशेष अभियान चलाई रहेको छ । दशै, तिहार जस्ता चाडपर्वमा अपराधिक घट्ना बढी हुने भएकोले दशै तिहारको सुरक्षाको लागि समेत विशेष योजना बनाई प्रहरीको हरेक यूनिट परिचालित भएको कुरा कार्कीले जनाउनु भएको छ । यसै सेरोफेरोमा यहा प्रस्तुत छ दोलखाका प्रहरी प्रमुख प्रहरी नायव उपरीक्षक रामेश्वर कार्की संग गरिएको कुराकानि ।

विभिन्न चाँडपर्वमा अपराधिक घट्ना हुने गरेका छन् । दशैको सुरक्षा व्यवस्था कसरी मिलाउनु भएको छ ?

दशै तिहार जस्ता पर्वमा गाँउ तहसम्म बिभिन्न अपराधिक घट्ना हुने गर्छ । दशैमा बिभिन्न ठाँउमा रहेका बिभिन्न स्वभावका मानिसहरु आउने भएकोले पनि यस्तो सम्भावना बढी हुने गरेका हुन् । त्यसैले प्रहरीले दशै तिहारको लागि विशेष सुरक्षा योजना बनाएको छ । जिल्लामा रहेका प्रहरीको हरेक युनिटमा तत्काल उद्धार गर्ने समूह (क्युआरटी) टिम बनाएको छ, बजारमा गस्ति बढाएको छ, राजमार्ग तथा सडक आसपास गस्ति बढाएको छ ।

दशै तिहारमा प्रहरीको निगरानिमा रहेको अपराधिक घट्नामा संलग्न व्यक्तिहरु आउने र बिभिन्न गतिविधि गर्ने गर्दछन्, यसमा प्रहरीको ध्यान पुग्ला त ?

प्रहरीले त्यस्तो कुरामा पनि निगरानि गरिरहेको छ । दोलखाको कुनै पनि ठाँउमा प्रहरीको निगरानिमा रहेको अपराधिक घट्नामा संलग्न व्यक्तिहरु(गुण्डा) आएको जानकारी पाए तत्कालै पक्राउ गरी कानुनी प्रकृया सुरु गरिने छ । दोलखा जिल्लामा एक महिनाको अवधिमा अदालतबाट कैद तथा जरीवाना तोकिएका ७४ जनालाई पनि पक्राउ गरी अदालतमा बुझाईएको छ । जिल्लामा कुनै पनि प्रकारको गुण्डागर्दी हुन दिईने छैन ।

अपराधिक व्यक्ति र समुहलाई राजनीतिक संरक्षण हुन्छ, त्यस्ता कोहि पक्राउ परीहाले छोड्नको लागि राजनीतिक दवाव आउछ भनिन्छ नी ?

दोलखा जिल्लामा अहिलेसम्म राजनीतिक रुपमा कुनै पनि अभियुक्त या अपराधिक घट्नामा संलग्नलाई छोड्न दवाव आएको छैन । कुनै नेताले व्यक्तिगत रुपमा पक्राउ परेका कसैको बारेमा जानकारी लिनु फरक हो तर छोड्नको लागि कसैले पनि दवाव दिने गरेका छैनन् ।

दशै तिहार जस्ता चाँडमा मदिराको कारण बिभिन्न हिंसात्मक घट्ना हुने गरेका छन् । चाँडवाडमा हुने मदिराको अस्वभाविक प्रयोग रोक्न के योजना छ ?

मदिराकै कारण बिभिन्न अपराधिक घट्नामा बृद्धि भएको, महिला हिंसा, घरेलु हिंसा जस्ता गतिविधिहरु बढेको र कानुन अनुसार अवैधानिक समेत भएकोले हामीले दोलखा जिल्लालाई घरेलु मदिरा मुक्त जिल्ला बनाउने बिशेष अभियान चलाई रहेका छौ । र दशै तिहार जस्ता चाँडवाडमा यसको प्रयोग अस्वभाविक हुने भएकोले जिल्ला प्रशासन कार्यालय, जिल्ला प्रहरी कार्यालय र कोष तथा लेखा नियन्त्रण कार्यालयको विशेष टोलि बनाएर होटलहरु सर्च गर्ने, शंकास्पद ठाँउमा खानतलासि गर्ने जस्ता कामहरु भै रहेका छन् । साथै सिल प्याक मदिराहरु पनि कानुनी रुपमा अनुमति लिएर बिक्रि वितरण भएको छ की छैन भन्ने पनि अनुगमन भै रहेको छ । तीन महिनाको अवधिमा दोलखा प्रहरीले ३० सेट घरेलु मदिरा बनाउने भाँडा, १५ हजार केजी कच्चा पर्दाथ र १० हजार लिटर मदिरा नष्ट गरिसकेको छ ।

घरेलु मदिराका कारण कस्ता कस्ता घट्नालाई बल पुगेको पाउनु भएको छ ?

जिल्ला प्रहरी कार्यालयमा आउने उजुरी र प्रहरीले गस्तीको क्रममा भेटेको घट्नाहरुलाई हेर्दा घरेलु मदिराका कारण घरेलु हिंसा, बालबालिका माथि हुने हिंसा, जर्वजस्ति करणी, बालबालिका कुलतमा लाग्ने जस्ता अपराधिक गतिविधि हुनुमा घरेलु मदिरा मुख्य कारक पाईएको छ । त्यसैले पनि यसको पूर्ण नियन्त्रण आवश्यक छ ।

दोलखा प्रहरीमा दर्ता भएका अपराधिक घट्नाहरुमा बढी कस्ता खालका घट्नाहरु छन् ?

जिल्ला प्रहरी कार्यालयमा दर्ता भएका अपराधिक घट्नाहरुमा जर्वजस्ति करणी, जर्वजस्ति करणी उद्योग, अनुसूचि १ अनुसारको बिभिन्न फौजदारी प्रकृतिका अपराधिक घट्नाहरु बढी पाईएको छ ।

दोलखा जिल्लामा आत्महत्याका घट्नाहरु पनि निक्कै हुने गरेको प्रहरीको तथ्याङ्कले देखाएको छ । यसको कारण के पाउनु भएको छ ? अनि आत्महत्या गर्नेमा महिला या पुरुष को बढी पाउनु भएको छ ?

अन्य जिल्लाको तुलनामा दोलखा जिल्लामा आत्महत्या गर्नेको संख्या निक्कै बढी छ । र आत्महत्या गर्नेमा महिलाहरुनै बढी पाईएको छ । उमेरको हिसाबले हेर्दा सबै उमेर समूहको पाईन्छ । आत्महत्या गर्नुको तथ्यगत कारण त पाउन मुश्किल छ किनभने मर्नेले त्यस्तो केहि खुलाएर गएको हुदैन तर सामान्यत घरायशी विवादकै कारण आत्महत्या गरेको धेरै पाईन्छ ।

दशै तिहार जस्ता चाँडपर्वमा जुवा तासको चर्चा पनि निक्कै हुने गर्छ, दोलखामा जुवातास नियन्त्रणको प्रयास कस्तो छ ?

जुवा तासका कारण धेरैको परिवार भाँडिएको छ, घरेलु हिंसाको कारण पनि जुवा तास हुने गरेको छ र यो गैर कानुनी पनि छ त्यसैले हामीले यसको नियन्त्रणको लागि अभियान चलाएका छौ । चाँडपर्व वा अन्य कुनै वहानामा जुवा तासले छुट पाउन सक्दैन । कसैले जुवातास खेलेको पाईएमा मुद्धा चलाएर कार्वाहि प्रकृया अगाडि बढाउछौ ।

प्रस्तुती– चिरञ्जीवी मास्के