सम्मान पूर्वक समयमै नेपाल फर्कन पाउने वातावरण बन्नु पर्दछ-चानक पोखरेल

संसार भरी महामारीको रूपमा फैलिएको कोरोना भाइरस  “कोबिड -१९” ले देश विदेशमा रहेका सम्पूर्ण नेपाली र विश्व जगत् नै त्रासदीपूर्ण वातावरणमा बाँच्नु परिरहेको छ । यसको रोकथाम र यसबाट बच्नका लागि अपनाउन सकिने सावधानीको बारेमा साथीहरूलाई बढीभन्दा बढी जानकारी दिनको लागि  नेपालीहरूको साझा संस्था गैर आवासीय नेपाली सङ्घ अन्तर्राष्ट्रिय समन्वय समिति, राष्ट्रिय समितिहरू, प्रवासी नेपाली एकता मञ्च र अन्य थुप्रै सङ्घ संस्थाहरू सक्रिय रूपमा लागि परेका छन् ।

तीव्र गतिमा फैलने यो भाइरसको प्रभाव युरोप अमेरिका जस्ता अति विकसित मुलुकहरूमा जुन स्पिडमा बढेको छ त्यसको तुलनामा मध्यपूर्व मा त्यो फैलिने स्पिड केही कम रहेजस्तो देखिन्छ तर पनि जनघनत्वको अनुपातमा बिमारी कम भेटिँदैमा जोखिम कम रहेको भनेर ढुक्क हुनसक्ने अवस्था छैन । मध्यपूर्वमा रहनुभएका सम्पूर्ण हामी नेपाली दाजुभाइ दिदीबहिनी जोखिममा छौँ । जो जहाँ जुनसुकै समयमा पनि सङ्क्रमित हुन सकिने आजको अवस्थालाई मध्यनजर राख्दै सकेसम्म सावधानी अपनाएर सुरक्षित रहनुहुन म सम्पूर्ण मित्रहरूमा अनुरोध गर्न चाहन्छु ।

 

विदेशमा खास गरी पहिलो विश्वमा रहेका नेपाली जनताको बारेमा सरकारी स्तरको चासो हामीले मिडियामा पढेर पनि थाहा पायौँ ।  खुसीको कुरा हो की देश बाहिर रहेका जनताको बारेमा सरकार  चिन्तित छ र अप्ठ्यारो अवस्था आइपरेमा उद्दारको लागि तदारुकता देखाउने छ ।  खास गरी मध्यपूर्वमा रहेका नेपालीहरूको परिस्थितिका बारे पनि हाम्रो सरकार जानकार छ  भन्ने कुरामा हामी मध्यपूर्वमा रहेकाहरू निकै आशावादी छौँ । 

कोरोना भाइरसको जोखिम सँग जुध्न बनाएको उच्चस्तरीय समितिको सम्पूर्ण ध्यान अहिले सङ्क्रमित पहिचान गर्ने र   बिमारीको उपचार गर्नेमा केन्द्रित रहेको छ । आवश्यक औषधिको आपूर्ति पनि उत्तिकै महत्त्वपूर्ण विषय हो । डाक्टरको सुरक्षा, अस्पताल, पिपीई लगायत तमाम आन्तरिक कुरामा  समिति अत्यन्तै व्यस्त छ, समितिका काम कारबाहीहरू प्रभावकारी रूपमा अगाडी बढोस् भन्ने कामना पनि गर्दछु ।

त्यसपछिको सबैभन्दा महत्त्वपूर्ण कुरा भनेको यो ‘कोभिड-१९’ समस्या केही हदसम्म सुल्झिएपछि अथवा अन्तर्राष्ट्रिय फ्लाइटहरू उड्न थालेपछि मध्यपूर्वको अवस्था निकै जटिल हुनेछ । हामीले अनुमान गरेभन्दा धेरै आप्रवासीले रोजगारी गुमाउन सक्ने अथवा स्वेच्छाले नेपाल फर्कनको लागि चाहाना राख्ने नेपालीहरू अत्यधिक हुन सक्छन् । त्यो अवस्थामा देश फर्कन चाहने नेपालीहरूको लागि सरकारले के कस्ता व्यवस्था गर्न सक्छ भन्ने कुराको आजै देखि अध्ययन गरी त्यसको तयारीमा लाग्नुपर्ने देखिन्छ ।

विदेश बसुन्जेल रगत पसिना बगाएर एक एक रुपैयाँ जोडेर रेमिटेन्स मार्फत देशको अर्थतन्त्रलाई टेवा पुर्‍याएका हरेक नेपाली दाजुभाइ दिदीबहिनीले सम्मान पूर्वक समयमै नेपाल फर्कन पाउने वातावरण बन्नु पर्दछ ।  हाम्रो सरकारले आफ्ना जनताको स्वदेश फर्कन पाउने अधिकार सुनिश्चित गर्ने वातावरण समयमै मिलाउन सकोस् र कोही पनि नेपाली थप समस्यामा पर्न नपरोस् भन्ने शुभकामना पनि यसै साथ व्यक्त गर्न चाहन्छु ।

सम्पूर्ण मित्रहरूमा नयाँ वर्ष २०७७ को धेरै धेरै शुभकामना व्यक्त गर्न चाहन्छु ।

चानक पोखरेल

अध्यक्ष, प्रवासी नेपाली एकता मञ्च, कतार ।

Follow @ChanakPokharel